Tenisi spanjoll, Rafael Nadal ka deklaruar se është tërhequr nga dy turnetë aziatikë, pasi akoma vuan dëmtimin që e detyroi të tërhiqet nga US Open. Në dy turnetë Masters që do të zhvillohen në Kinë respektivisht në Shanghai dhe Pekin, do të mungojë numri 1 i botën në tenis për meshkuj. “Këtë javë kam qenë në Barcelonë për të takuar mjekët dhe për të zbuluar shkallën e dëmtimit.
Kam ende dhimbje dhe më bezdis kjo situatë, ndaj bashkë me stafin teknik vendosëm të mos marr pjesë në turnetë aziatikë, në mënyrë që të rikuperoj 100% dhe të jem gati për sfidat e fundvitit. Këtë gjë e kemi bërë edhe në të shkuarën. Më vjen keq për fansat e mi në Azi, shpresoj të shihemi vitin tjetër”.
Nadal tashmë synon të jetë gati për turneun Masters të Parisit në 28 tetor i cili do të jetë turneu i fundit për këtë vit ATP World Tour Finals që zhvillohet në Londër dhe që marrin pjesë 8 tenistët më të mirë të botës. Megjithatë me mungesën në Shanghai dhe Pekin, Nadal do të humbasë 1100 pikë në renditjen e përgjithshme të ATP, që do të thotë se avantazhi i tij ndaj Djokovic do të shkurtohet në vetëm 1200 pikë dhe në rast se serbi triumfon në këto dy turne atëherë Nadal rrezikon të humbasë kreun.
