Ministria e Drejtësisë ka nisur kolaudimin e byzylykëve të sigurisë së të dënuarve. Në orën 14: 30 në ambientet e ministrisë, u paraqitën përfaqësuesit e kompanisë private që ofron shërbimin e mbikëqyrjes elektronike ku u dorëzuan pajisjet. Ata lejuan grupin e punës së Ministrisë së Drejtësisë që të bëjë kolaudimin e pajisjeve, proces që do të realizohet së bashku me ekspertët e kompanisë.
Për shkak të kompleksitetit të procesit është kërkuar bashkëpunimi dhe ndihma e agjencisë kombëtare të shoqërisë së informacionit, për të mbikëqyrur procesin.
Në përfundim të kolaudimit, ministria e drejtësisë do të realizojë marrjen në dorëzim të këtyre pajisjeve, me qëllim garantimin e zbatimit të kontratës dhe realizimit të procesit të mbikëqyrjes elektronike sipas ligjit.
Për të mos penguar funksionimin e shërbimit, kolaudimi i pajisjeve do të jetë i pandërprerë. në këtë mënyrë duket se do të mbyllet dhe debati mbi 300 byzylykët për sigurinë elektronike të të dënuarve në Shqipëri.
