Që pas ngjarjes së rëndë në Bularat, ku u vra ekstremisti Kacifas, mediat greke vijojnë t’i hedhin benzinë zjarrit. Së fundmi, ato shkruajnë për një vendim që sipas tyre lejon shitjen e pronave të familjeve etnike greke në Himarë, Vlorë e Ksamil.
Artikulli është shkruar nga media Ekathimerini, që nis me fjalinë:
“Ministria e Jashtme e Greqisë dënoi të martën një vendim të qeverisë shqiptare për të konfiskuar pronat që u përkisnin familjeve etnike greke në jug të vendit.”
Ekathimerini shkruan se vendimi i Këshillit të Ministrave të Shqipërisë përfshin shitjen e pronës që u përkasin grekëve etnikë në zonat e Himarës, Vlorës dhe Ksamilit, si dhe është nënshkruar nga kryeministri Rama.
“Në një deklaratë, Ministria e Jashtme greke i kërkoi Tiranës të anulojë vendimin, duke e quajtur atë një shkelje të Konventës Evropiane për të Drejtat e Njeriut, si dhe vendimet e mëparshme të gjykatës. “Veprime të tilla nuk janë në përputhje me aspiratat e deklaruara evropiane të Shqipërisë dhe janë në kundërshtim me detyrimet e saj përkatëse”, thuhej në deklaratë. Ministria tha se do të monitoronte zhvillimet duke vazhduar përpjekjet për të ndërtuar marrëdhëniet e besimit dhe bashkëpunimit.
Ndërkohë, organizata Omonoia që përfaqëson minoritetin grek u zotua të përdorë të gjitha mjetet ligjore në dispozicion të tij me qëllim të mbrojtjes së të drejtave dhe interesave të grekëve etnikë në rajon.”, përmbyllet artikulli i Ekathimerini./ TIRANA TODAY
