Sekretari i Përgjithshëm i PD, Flamur Noka është përplasur disa herë me Sokol Bizhgën, zv drejtorin e Përgjithshëm të Policisë së Shtetit.
Ai gjithashtu ka tentuar ta godasë atë gjatë protestës së organizuar nga opozita.
Sheshi “Willson” dhe “Zogu i Zi” u shbllokuan pas mbi 2 orësh protestë.
Protestuesit janë larguar dhe ka nisur lëvizja e mjeteve në këto dy pika kyçe, ndërsa vijon ende në tre pika të tjera, Bashkia, Rruga e Elbasanit dhe Pallati me Shigjeta.
Demokratët ashtu si në protestën e 29 tetorit po vijojnë me të njëjtën strategji të mosbindjes civile, me bllokim rrugësh, bllokim aksesh apo nyjesh kryesore të qarkullimit në kryeqytet.
Deputetët janë ndarë në disa grupe në pikat kyçe të Tiranës, si Bashkia, Rrethrrotullimi i “Zogut të Zi”, “Rruga e Elbasanit”, “Sheshi Willson” dhe “Pallati me Shigjeta”.
Shumë prej qytetarëve që kanë qenë duke lëvizur me mjetet e tyre kanë ngelur të bllokuar prej më shumë se një ore tashmë.
Protesta e opozitës nisi me tensione që në minutat e para, pasi policia kundërshtonte bllokimin e akseve në kryeqytet. Deputetët e opozitës nga ana tjetër kundërshtuan efektivët dhe u përplasën fizikisht me ta.
Deri më tani ka disa të shoqëruar nga policia, ndërsa një person është lënduar nga uji me presion.
Por me evidenti ka qene debati mes Nokes dhe Bizhges, numrit dy te policise se shtetit.
Pasi e akuzoi se ka nxjerrë në pritë Gjergj Mehmetin në vitin 1997 për ta vrarë banditët, Flamur Noka u përball me zv.drejtorin e Policisë së Shtetit, Sokol Bizhga te kryqëzimi i “Rrugës së Elbasanit”, ku sekretari i Përgjithshëm i PD printe grupin e protestuesve që bllokuan qarkullimin.
Në një video të siguruar nga A2 CNN, dëgjohet Noka që i thotë Bizhgës se ai i shërben bandave të krimit, ndërsa ky i fundit ia ktheu duke thënë se për 34 vite i ka shërbyer vetëm shtetit shqiptar, pavarësisht se cila parti ka qenë në pushtet.
Noka: Unë ty personalisht do të të shtyp në çdo aspekt!
Bizhga: Dëgjo! Unë i kam shërbyer 34 vite këtij shteti, majtas dhe djathtas. Unë jam në punë të vet.
Noka: Ti i shërben bandave dhe jo pushtetit. Ti i shërben krimit. Ti nuk ke lidhje me fytyrën e këtyre policave. Ti je pasqyrë e një krimi. Ti je pasqyrë e horrave, s’je polic ti.
(Protestues në distancë: Si e përdor dhunën mor burrë. A je familjarë, a ke kalamaj, si e përdor dhunën ti)
Bizhga: E ke gabim ti!
(Protestuesi në distancë: Legen. Je duke dalë në pension dhe përdor dhunën. Si mor përdor dhunën? A ke nën, a ke babë, a ke kalamaj ti, a ke motër mor…)
