Mbledhja e fundit e Këshillit Bashkiak të Elbasanit u shoqërua me tensione të forta, pasi këshilltarët e opozitës mbërritën me 15 minuta vonesë dhe refuzuan të uleshin në vendet e tyre si formë proteste. Situata u përshkallëzua kur këshilltarja e Partisë Demokratike, Doris Madhi, ngriti shqetësime të rënda për inceneratorin e Elbasanit.
“Inceneratori i Elbasanit nuk është mall pa zot, aq më pak kalë beteje që mund të shalohet vetëm gjatë fushatave elektorale!”, u shpreh ajo me tone të ashpra. Madhi denoncoi mungesën e kontratës së inceneratorit në rendin e ditës, dokument që sipas saj është refuzuar të rinovohet që prej janarit 2025.
Ajo kërkoi sqarime mbi funksionimin e një kontrate të pavlefshme, pagesat e punonjësve dhe mungesën e dokumentacionit financiar nga Bashkia e Elbasanit. “Ku po shkojnë 7 milionë euro?”, ishte një nga pyetjet e forta që ajo hodhi në sallë, duke akuzuar për mungesë transparence në menaxhimin e fondeve publike.
Në përfundim të fjalës, Madhi u bëri thirrje qytetarëve për reagim publik:
“Nëse ju dhimbset jeta juaj dhe e fëmijëve që po rriten brenda një flluske kancerogjene, bashkohuni me ne në mbledhjen e nesërme! Kjo nuk është politikë, as propagandë, por detyrim ndaj jetës!”
Në të njëjtën linjë reagoi edhe këshilltari i PSD-së, Erion Murataj, i cili denoncoi grumbullimin e mbetjeve në Elbasan nga tetë qytete të tjera dhe mosfunksionimin e inceneratorit, që ka krijuar një “mal gjigand” plehrash pranë qytetit.
Pas këtyre deklaratave, opozita u largua nga mbledhja, duke bojkotuar pjesën e mbetur të saj.
