Kryetari FRPD-së, Besart Xhaferri u shpreh sot se pas 11 majit, PD-ja ka një objektiv madhor, që është rikthimi i të rinjve në atdhe. Xhaferri akuzoi kryeministrin Edi Rama se i largoi të rinjtë nga vendi.
Gjatë fjalës së tij, në një takim me të rinjtë, Xhaferri tha se fokusi kryesor i qeverisë Berisha 3 do të jetë kthimi i të rinjve, për tu dhënë mundësitë që këtu të kenë të njejtën cilësi jetese si në vendet e Europës.
Xhaferri tha se burimi më i madh i vendit janë veçanërisht të rinjtë.
Xhaferri shtoi se për PD-në, Shqipëria nuk është mandati i radhës, por gjenerata e së ardhmes.
“Ky do të jetë fokusi kryesor i qeverisë Berisha 3, të kthejë të gjithë ata që janë larguar, t’i kthejë në shtëpi, tu japë të gjitha mundësitë, të gjitha shanset, të gjitha incentivat, në mënyrë që të vijnë dhe të bëjnë këtu të njejtën cilësi jetese, ndoshta edhe më të mirë, nga ajo që kanë në Europë.
Shqipëria është një vend me pasuri nëntokësore dhe bukuri natyrore të pamata, por në fakt burimi ynë më i madh është mbi tokë, kapitali njerëzor dhe veçanërisht të rinjtë tanë.
Pas 11 Majit ne kemi një objektiv madhor, rikthimin e të rinjve në atdhe, ata të rinj që i largoi Edi Rama.
Shqipëria për ne nuk është mandati i radhës, por gjenerata e së ardhmes!”,-tha Xhaferri.
