Një test gjaku mund të shpëtojë jetën e shumë personave. Janë studiuesit australianë të cilët po merren në këtë drejtim, e ndërsa janë të mendimit se një test gjaku mund të zbulojë fazat fillestare të kancerit të lëkurës. Shkencëtarët nga Universiteti Edith Cowan, bëjnë të ditur se testi i ri do ti ndihmojë doktorët që të zbulojnë kancerin e lëkurës para se të shpërndahet në trupin e njeriut.
Sipas tyre, të gjithë pacientët të cilët zbulojnë sëmundjen që në fazat e para, kanë shanse për ta kuruar në kohë e për të mos pasur pasoja më vonë. “Pacientët që zbulojnë fazat e para të sëmundjes, kanë një normë të mbijetesës pesë vjeçare në mes të 90 dhe 99 për qind”, deklaroi udhëheqësja e studimit, Pauline Zaenker.
Ajo ka shtuar se normat e mbijetesës ulen në më pak se 50 për qind nëse kanceri shpërndahet në trup. “Kjo është ajo çfarë e bën këtë test të gjakut kaq të mrekullueshëm, sepse mund të vërejë tumoret në fazat e para, kur ende janë të trajtueshme”, ka thënë ajo.
Studiuesit analizuan 105 pacientë me kancer të lëkurës dhe 104 persona të shëndetshëm. Testet kanë rezultuar me zbulim të tumoreve në fazat e para në 79 për qind të rasteve, kanë thënë shkencëtarët. Sipas Organizatës Botërore të Shëndetësisë, një në tre rastet e prekura me kancer, diagnostikohet me kancer në lëkurë, ndërsa Australia thyen rekordin, pasi ka numrin më të madh të personave të prekur me këtë tip të kësaj sëmundje.
