Kreu i Partisë Demokratike, Sali Berisha, ka ngritur shqetësimin për rritjen e numrit të dosjeve të pazgjidhura në sistemin e drejtësisë në Shqipëri. Gjatë një tryeze diskutimi mbi Reformën në Drejtësi, Berisha tha se numri i çështjeve gjyqësore është rritur nga 130 mijë në 150 mijë dhe se situata mund të përkeqësohet nëse nuk ndërmerren masa.
Një nga problemet kryesore, sipas Berishës, është mungesa e të rinjve në sistemin e drejtësisë, për shkak të një barriere burokratike të quajtur “shkolla Rakipi”. Ai e cilësoi këtë shkollë si një mekanizëm që pengon të diplomuarit në drejtësi të bëhen gjykatës apo prokurorë.
“Sot janë qindra, në mos mijëra, shqiptarë të shkolluar në shkollat më të mira të Shqipërisë, Europës dhe botës, por që nuk futen dot në sistemin e drejtësisë. Jo, sepse duhet të kalojnë shkollën Rakipi, që është simbol i një mafieje në sistemin e drejtësisë. Dhe nëse nuk hyjnë aty, nuk mund të punojnë as prokurorë, as gjykatës.”
Berisha theksoi se për të shmangur kaosin në sistemin e drejtësisë, duhet të lehtësohet hyrja e të rinjve të kualifikuar në këtë fushë, në mënyrë që të përballohet fluksi i madh i dosjeve të grumbulluara ndër vite.
“Do rrimë kështu të presim? Jo mor zotëri. Dosjet po rriten nga viti në vit. Kanë qenë 130 mijë, tani janë 150 mijë.”
Ish-kryeministri bëri thirrje për ndryshime të menjëhershme në procesin e rekrutimit në drejtësi, duke e cilësuar reformën aktuale si të dështuar dhe të kapur nga interesa të ngushta.
