Lazio po kalon një sezon fantastik, pasi vazhdon rrugëtimin në Europa League dhe në kampionat është në garë për të siguruar një vend në Champions League. E gjithë kjo meritë e një trajneri aq pak të njohur si Simone Inzaghi, por edhe e lojtarëve cilësorë që ka arritur të sigurojë Drejtori Teknik, Igli Tare.
Tare, gjatë programit “Calcio E Mercato”, të televizionit “Sportitalia”, ku ishte i ftuar për të marrë çmimin e Drejtorit Sportiv të vitit ka komentuar edhe situatën e ekipit. Së fundmi është folur për mundësinë që Inzaghi të shkojë te Juventusi apo Napoli, por Tare i hodhi poshtë këto opsione.
“Unë dhe Lotito e dinim që ishte i destinuar të ishte me ne. Nuk është gati as për Juventusin e as për Napolin sepse është pjesë e Lazios edhe për të paktën dy sezone të tjerë. Do të duhet të kalojë kohë deri në largimin e tij. Inzaghi është i lidhur me klubin dhe ne nuk duam ta humbasim atë, të paktën jo përpara mbylljes së kontratës, pra edhe për 2 vjet të tjerë. Unë uroj që ai të qëndrojë 20 vjet jo dy”, deklaroi Tare.
