Eurodeputetja Tanja Fajon ka deklaruar se është kundër korrigjimit të kufijve të Kosovës. Në një intervistë për serben Danas, Raportuesja për liberalizimin e vizave për Kosovën në Parlamentin Evropian, tha se kjo është një çështje shumë e ndjeshme dhe se do ta destabilizonte rajonin:
“Çdo ndryshim i kufijve është çështje shumë e ndjeshme. Nuk jam ithtare e një ideje të tillë, sepse frikësohem se kjo do të kishte një efekt negativ për tërë rajonin, dhe se do ta destabilizonte atë. Kjo është ajo çfarë nuk më shqetëson vetëm mua, por edhe shumë vende të BE-së”.
Si parim të përgjithshëm, ajo veçoi se “çdo zgjidhje, që sjell te normalizimi i jetës, pa trende nacionaliste dhe populiste dhe pa manipulime politike, do të ishte ajo që duhet ta bëjnë politikanët nga të dyja taborët”.
Më tej, eurodeputetja tha se i takon Bashkimit Evropian tashmë ta marrë procesin në duar:
“BE duhet përfundimisht ta marrë procesin në duart e saj. Serbia dhe tërë Ballkani tashmë është një terren për fuqitë e mëdha, për BE-në, SHBA-të, Turqinë, Rusinë, Kinën”.
