Një ‘elefant i uritur’, ka hyrë brenda ambienteve të kuzhinës së një shtëpie në Tajlandë duke shembur murin, dhe për të marrë një thes me oriz.
Elefanti i quajtur Plai Bunchuay, nuhati ushqimin dhe hyri në shtëpinë e Rachadawan Phungprasopporn në orën dy të mëngjesit të së dielës, shkruan Daily Mail.
Ajo dhe burri i saj u zgjuan nga zhurma dhe shkuan me shpejtësi në kuzhinë për të parë se çfarë kishte ndodhur. Ata u tronditën kur panë elefantin në ambientet e shtëpisë, madje ai kapi një qese plastike me oriz të cilën e futi në gojë.
“Ky elefant është i njohur në zonë sepse shkakton shumë probleme . Ai kishte ardhur përsëri në shtëpinë tonë dy muaj më parë dhe po shikonte përreth, por më pas nuk shkaktoi dëm.”, tha e zonja e shtëpisë.
Pas disa përpjekjesh, ata arritën që ta largonin kafshën, që mendohet se tashmë ka shkuar në pyll.
Një nga zyrtarët lokalë për mbrojtjen e faunës lokale, deklaroi se shpjegimi më i mundshëm për “vizitën e elefantit” është se ka ndjerë aromën e ushqimit dhe ka dashur ta provojë.
