Talentet e Interit, shpresa e fundit e Bushit për të prekur Europianin

Kombëtarja U-21luan dy sfida mjaft të rëndësishme, të cilat kanë vlerën e një bilete për në Europianin 2019. Kundërshtari do të jetë i vështirë, por jo i pamposhtur, Sllovakia. Me dy rezultate pozitive ekipi Shpresa kërkon që të pozicionohet e dyta pas Spanjës kryesuese.

Matematika u jep ende shpresë, por Shpresat vuajnë nga mungesa të shumta. Mesfushorët Qazim Laçi e Agim Zeka dhe sulmuesi Florin Durmishaj janë mungesa të sigurta, ndërsa portieri Selmani është në dyshim.

Si të mos mjaftonin këto, Shpresave do t’u mungojë edhe Ylber Ramadani që do të grumbullohet me Kombëtaren A, duke parë mungesat e shumta në mesfushë. Në këtë situatë, trajneri Alban Bushi ka ftuar për herë të parë mesfushorin e Interit, Armand Rada dhe ka rikthyer sulmuesin Rey Manaj.