Kryeministri i Kosovës, Ramush Haradinaj ka komentuar sërish taksën 100% ndaj produkteve serbe e boshnjake. I ftuar në televizionin A2, kryeministri i Kosovës tha se pritet të merret një tjetër masë ndaj Serbisë.
“Taksa 100% nuk do të jetë e vetmja, ky nuk është maksimumi që do të bëjmë”, ka deklaruar Haradinaj, duke shtuar më tej se “taksa ndaj Serbisë nuk i ka shkaktuar dëme biznesit në Kosovë”.
Ndërkohë, autoritetet serbe e thonë hapur se tarifat po u kushtojnë humbje të mëdha. Haradinaj komentoi sërish dhe çështjen e kufijve, duke u treguar stoik: nuk luajnë vendit!
“Mes Kosovës dhe Serbisë do të ketë një kontratë gjithëpërfshirëse ku do të përcaktohen të gjitha çështjet. Por korrigjimi i kufijve nuk është pjesë e kësaj pakete. Serbia ka pasur gjithmonë ide për ndarjen e Kosovës, por në veri nuk do të ketë skenar ukrainas”, tha shefi i qeverisë kosovare.
