Surprizon Sadiku: Legia nuk ia di vlerën Ferrarit dhe më la në stol

Armando Sadiku ka bërë një hap të madh në karrierë, duke kaluar nga Legia e Varshavës tek Levante në Spanjë. Tek ekipi polak sulmuesi elbasanas nuk kaloi një periudhë të mirë pasi më shumë qëndroi në stol, por aftësitë e tij ishin të padiskutueshme dhe kjo bëri që të transferohej në një kampionat elitar.

Në një intervistë Sadiku ka analizuar të shkuarën e “zezë” në Poloni, por ka theksuar edhe ambiciet e mëdha që ka. Sulmuesi shqiptar, që shënoi dy gola në kampionat dhe 4 në Kupë në muajt e tij tek Legia, ia dedikon rendimentin nën pritshmëritë e tij shanseve të pakta që iu dhanë në skuadrën polake, ndërsa shprehet:  “Qëndrimi im në stol ishte si të blesh një Ferrari dhe ta mbash në garazh. U zhgënjeva që nuk pata më shumë shanse. Nuk arrita objektivin tim për sa i përket numrit të golave, por si mund ta bëja kur nuk luaja. Gjithsesi, nuk i vë faj vetes, pasi bëra gjithçka munda dhe punoja mirë në stërvitje. Erdha te Legia pa fazë përgatitore dhe tani besoj se kam punuar mirë në dimër mund të luaj më shumë”.

Sadiku nuk harron të theksojë se është i lumtur për shansin që iu dha me transferimin te Levante, ndërsa zbulon se oferta e klubit spanjoll erdhi papritur dhe gjithçka u mbyll brenda ditës. Levante do të luajë këtë fundjavë me Realin e Madridit, ndeshje për të cilën Sadiku shprehet se nuk e di nëse do të mund të debutojë në skuadrën e tij të re në përballjen me “yjet” e “Los Blancos”, por shton se edhe pse i vjen keq që te Levante nuk do të luftojë për titullin si në Poloni, nuk mund të jetë kurrsesi i penduar për vendimin që ka marrë për t’u transferuar në La Liga.