Mesfushori Ergys Kaçe është risia e madhe e ndeshjes së Kombëtares Shqiptare në ndeshjen e sotme ndaj Skocisë, që luhet në Loro Boriçi.
Kaçe ishte lënë vazhdimisht në harresë nga trajneri italian, por ai ktheu sytë nga mesfushori pas dëmtimit të Ndojit dhe pezullimit të Bashës për shkak të kartonave.
Në qendër të mesfushës, Panucci ka dy elementë të paprekshëm, si Xhakën e Memushajn. Para Strakoshës do të rreshtohet katërshja Veseli-Gjimshiti-Mavraj-Binaku, me lojtarin e Empolit që do të jetë në vend të Hysajt në të djathtë.
Krahët e mesfushës, ata që duhet të ndihmojnë sulmin, do të mbulohen nga Grezda i riaftësuar dhe Uzuni. Ndërsa Balaj do të jetë sulmuesi i vetëm përpara, me Manajn e gatshëm të japë kontributin e tij në pjesën e dytë.
