Këshilli i Lartë Gjyqësor (KLGJ) ka reaguar pas deklaratave të bëra nga kryeministri Edi Rama, të cilat, sipas tyre, cenojnë figurën dhe pavarësinë e gjyqtarëve pranë gjykatave të posaçme për korrupsionin dhe krimin e organizuar. Reagimi i KLGJ erdhi pasi kryeministri Rama sulmoi direkt gjykatësin Erjon Bani, që firmosi arrestimin e Erjon Veliajt dhe mediat proveritare akuzuan Banin si gjyqtar të Berishës dhe kundër PS-së.
Rama, gjatë mbledhjes së grupit parlamentar të Partisë Socialiste, lexoi një mesazh nga një person të cilit nuk ia përmendi emrin, duke thënë se gjykatësi që firmosi arrestimin e Veliajt ishte zgjedhur enkas nga prokurorët dhe se ka firmosur gjithnjë vendime “me target njerëzit tuaj”.
Duke iu referuar gjykatësit Erjon Bani, por pa ia përmendur emrin, Rama e fajësoi atë për nxjerrjen e dosjes Toyota Yaris, mesazhet e së cilës kanë dalë tashmë dhe po lexohen në publik nga shefi i opozitës. Sipas të njëjtit mesazh, ky gjykatës ka qenë shok në zyrë me një nga deputetët e PD-së gjatë kohës kur ministër i drejtësisë ka qenë Eduart Halimi.
Reagimi i KLGJ
Këshilli i Lartë Gjyqësor ka ndjekur me vëmendje zhvillimet e fundit në lidhje me deklaratat e bëra nga persona të veshur me pushtet, ekzekutiv apo politik si edhe media të caktuara, të cilat prekin figurën dhe dinjitetin e gjyqtarëve pranë gjykatave të posaçme për korrupsionin dhe krimin e organizuar. KLGJ mban qëndrimin se çdo përpjekje për të cënuar pavarësinë e gjyqësorit, nëpërmjet trysnisë apo presionit të çfarëdo lloji, përbën një kërcënim të drejtpërdrejtë ndaj pavarësisë, demokracisë dhe sundimit të ligjit.
Këshilli në përmbushje të angazhimeve të tij ligjore, ju bën thirrje të gjithë aktorëve që të shmangin trysninë në formën e deklaratave, citimeve apo aludimeve që cënojnë gjyqtarët për shkak të ushtrimit të funksionit.
Në një shtet të së drejtës, pavarësia e gjyqësorit është një ndër shtyllat themelore për garantimin e drejtësisë dhe mbrojtjen e të drejtave dhe lirive të qytetarëve. Gjyqtarët duhet të jenë të lirë nga çdo lloj forme që ndërhyn në vendimmarrje, në mënyrë që të ushtrojnë detyrën në përputhje me Kushtetutën dhe ligjet në fuqi.
Këshilli thekson se në një shtet që është duke përmbushur kriteret e anëtarësimit në BE, mënyra e vetme e kundërshtimit të një vendimmarrjeje gjyqësore duhet të jetë përmes ushtrimit të mjeteve ligjore, duke u ankuar në një gjykatë më të lartë.
