Bordi Suedez i Migracionit në Suedi ka marrë rreth 8.200 vendime për azilkërkuesit në muajt e parë të 2017-s, 49% e të cilave janë pranuar.
Përsa i përket shqiptarëve, rezulton se janë marrë 84 vendime, nga të cilat janë pranuar vetëm 2, përqindje mjaft e vogël kjo krahasuar me mesataren e aplikimeve.
Avokatja në Kryqin e Kuq, Aleksandra Sefenstedt, pranon se vendet e Ballkanit kanë një nivel të lartë refuzimi.
“Suedia nuk ka një listë të vendeve të sigurta, megjithatë shtetet ballkanike konsiderohen si të tilla”, thotë ajo.
Megjithatë, ka pak shanse që Suedia të pranojë azilantë nga Shqipëria dhe kjo është duke aplikuar për punë.
Instituti Suedez publikon në faqen e tij disa këshilla të dobishme që do të lehtësojnë kërkimin për punë dhe zhvendosjen në Suedi.
Se si duhet të aplikoni për një punë në Suedi varet nga industritë. Përgjithësisht dërgoni një CV dhe një letër motivimi në mënyrë elektronike, ku të përfshini një pasqyrë të përvojës së punës suaj, studime, arritjet apo çmime, aftësi të veçanta dhe referenca. Më pas kompania do të përzgjedhë aplikantët që do të intervistohen, shkruan Monitor.
Intervista juaj e parë mund të bëhet me anë të telefonit ose video-konference (p.sh., Skype), ose mund të ftoheni në vend.
Në varësi të fushës dhe llojin e pozicionit mund të duhen disa intervista ose plotësimi i një testi.
Pas kësaj, punëdhënësi do të lidhet me ju për t’ju vënë në dijeni nëse jeni zgjedhur për këtë punë. Pasi të keni një ofertë pune, hapat e ardhshëm do të varen nga kombësia.
Profesionet për të cilat Agjencia e Migracionit ka dhënë lejet e punësimit janë specialistë, teknikë dhe profesione të lidhura me të, shërbime, kujdesi dhe shitje, si dhe profesione menaxheriale etj.
Për shqiptarët, sipas të dhënave nga Agjencia Suedeze e Migracionit, kanë dhënë gjithsej 52 leje pune, kryesisht për punonjës shtëpie dhe staf restoranti.
