Veriu i vendit është përfshirë nga stuhi të forta dëbore, duke sjellë edhe problematika të shumta. Autoriteti Rrugor Shqiptar (ARRSH) bën me dije se akset Hani i Hotit-Tamarë, Tamarë-Vermosh dhe Bogë-Theth janë bllokuar prej reshjeve të dëborës. Sipas ARRSH, makineritë dhe punëtorët janë në punë për pastrimin e bores dhe mbajtjen hapur të akseve, por për shkak të erës së fortë ato bllokohen sërish.
Për pasojë, këshillohet të shmanget sa me shumë qarkullimi në këtë aks, përveç rasteve të emergjencës, sepse pamja është e vështirë nga furtunat e erës si dhe ka rrezik për shkarje të borës në rrugë, apo ortekë.
Edhe në bashkitë Pukë e Fushe Arrës ka reshje të shumta dëbore, ku sipas informacioneve nga krerët e këtyre bashkive, akset nacionale janë të hapura, por ka probleme në rrugët periferike.
Në Fushë Arrës ka rreth 20 centimetra dëborë, ndërsa në fshatra ajo i kalon gjysmë metri. Shqetësim mbetet mungesa e energjisë në disa fshatra të largëta të Berishës dhe Iballës. Shkak është era e forte dhe bllokimi i rrugëve.
