Prezantohet para publikut shqiptar libri i studiuesit turk Mehmet Tutuncu, i cili përmban mbishkrimet otomane në monumentet e kulturës shqiptare.
Ky libër përmbledh 114 mbishkrime, të cilat janë rezultat i një pune kërkimore thuajse 8-vjeçare në territorin shqiptar.
Pas një pune 8-vjeçare, studiuesi turk Mehmet Tutuncu ka prezantuar librin që nxjerr në pah mbishkrimet osmane në monumentet e kulturës.
Sipas Tutuncu, libri është një përpjekje për të inventarizuar mbishkrimet otomane që kanë mbijetuar në Shqipëri dhe vjen në 50 vjetorin e shkatërrimit të monumenteve të kulteve fetare:
“Koleksioni konsiston në 114 mbishkrime shkruar në gure, dru e mure. Sigurisht që libri nuk është i plotë, pasi çdo ditë zbulohen mbishkrime të reja. Libri është një përpjekje për të inventarizuar mbishkrimet otomane që kanë mbijetuar në Shqipëri dhe vjen në 50-vjetorin e shkatërrimit të monumenteve të kulteve fetare.”
Ky libër është vlerësuar edhe nga studiuesi Aleksandër Meksi, i cili e sheh atë si një domosdoshmëri dhe instrument për të intensifikuar më tej studimet në këtë fushë.
“Studimeve shqiptare i mungonte për shumë arsye një punim i tillë, por sot ne e kemi në dorë falë punës këmbëngulëse të Mehmet Tutuncu. Ne i gjykojmë të mëdha vlerat shkencore të korpusit, nivelin dhe dobinë e tij, një shembull që duhet ndjekur dhe pse jo dhe thelluar me gjetje të reja nga kjo periudhë”, tha Meksi.
