Kryetarja e Kuvendit, Elisa Spiropali, ka ndarë rrëfimin e saj personal në emisionin Kjo Javë në News24, duke folur për arritjet e saj të hershme në arsim dhe ndikimin që ka pasur shkollimi jashtë vendit në formimin e saj profesional dhe personal. Ajo u shpreh se ishte ndër 5 gjimnazistet më të mira të Shqipërisë, duke fituar një bursë për të studiuar në një kolegj ndërkombëtar në Vancouver të Kanadasë. “Ishim 200 nxënës nga 85 vende të botës,” – tregoi ajo, duke theksuar se ishte një eksperiencë që i hapi horizontin dhe ndikoi drejtpërdrejt në rrugëtimin e saj jetësor.
Më tej, Spiropali theksoi se pas kolegjit, përfundoi studimet universitare në SHBA dhe u rikthye në Shqipëri në vitin 2006, pa e menduar asnjëherë largimin përfundimtar nga vendi. “Kam pasur gjithmonë një raport romantik me Shqipërinë,” – u shpreh ajo.
Ndër shprehjet që e frymëzojnë më shumë, Spiropali përmendi një fjalë të urtë popullore: “Mos u gëzo o i gëzuar, mos u hidhëro o i hidhëruar,” duke shtuar se pozitat janë të përkohshme dhe se gjithmonë duhet ruajtur ekuilibri. Ajo vlerësoi gjithashtu rolin e grave në politikë, duke theksuar se në listat e Partisë Socialiste për deputete ka jo vetëm numër të lartë grash, por edhe cilësi të spikatur në përfaqësim.
Elisa Spiropali: Po, është e vërtetë, isha ndër 5 gjimnazistet më të mirë të Shqipërisë. Unë kam bërë kolegjin në Kanadanë Perëndimore, në Vankuver. Ishte shkollë ndërkombëtare, ne ishim 200 nxënës nga 85 vende të botës. Unë kam mbaruar gjimnazin Qemal Stafa dhe fituam bursën 5 nxënës. Kaloje në një konkurs, ai që intervistonte ishte drejtori i shkollës britanike. Ishte një sukses dhe fat i madh. Ajo shkollë më ka bërë kjo që jam, ishte shkollë e jashtëzakonshme. Më pas, kam kryer Universitetin në SHBA. Shkollimi jashtë më ka bërë të jem kjo që jam. Kam ikur më 1999 e jam kthyer më 2006 dhe asnjëherë nuk kam menduar që të largohem nga vendi. E mendoja gjithmonë kthimin, kisha raport romantik me vendin tonë. Shprehja më e bukur që më pëlqen është që “mos u gëzo o i gëzuar, mos u hidhëro o i hidhëruar”. Pra, ruaj një ekuilibër, pozita nuk është e jotja gjithmonë, ti je i përkohshëm. Më vjen shumë mirë që në këto lista të PS për kandidate për deputete kemi shumë gra. Gratë nuk përfaqësohen vetëm me numra, por edhe me cilësi.
