Katër pikë në katër ndeshje, një nisje katastrofike e Interit në Serie A. Të besuarit e Spallettit pritej që të shkëlqenin këtë sezon dhe të ishin skuadra anti-Juventus, por në këto javë të para nuk ka rezultuar kështu. Humbja me Parmën duket se ka “tronditur” ambientin zikaltër dhe i ka futur në “krizë” në prag të një ndeshje mjaft të rëndësishme në Champions League. Interi të martën do të presë Tottenhamin në “San Siro”, një rikthim pas 6 vitesh.
Luciano Spalletti nuk e mohon që skuadra e tij po kalon moment negativ, por mundohet që të shikojë përpara.
“Rezultatet nuk janë të mira, por nuk jemi konfuzë. Tottenham është i fortë fizikisht, por edhe teknik dhe i shpejtë. E dimë se si përballohet një ekip si ai. Mund të jetë ndeshja e kthesës, ajo që do të na çlirojë”, ka thënë trajneri i Interit në konferencën përpara ndeshjes.
