Mediat ndërkombëtare po i bëjnë jehonë lajmit se SPAK ka ngritur zyrtarisht akuzat ndaj ish-presidentit Ilir Meta.
Gazeta e madhe amerikane, ‘Washington Post’ thekson se Meta është një kritik i zëshëm i kryeministrit Edi Rama.
Sipas gazetës, Meta i cilëson akuzat një sulm politik ndaj tij.
“Ish-Presidenti i Shqipërisë, Ilir Meta, u akuzua zyrtarisht të martën për korrupsion, pastrim parash, evazion fiskal dhe fshehje pasurie nga autoritetet, tha avokati i tij.
Akuzat iu komunikuan Metës përmes një raporti 192-faqësh nga prokurorët kundër korrupsionit, bëri të ditur avokati Kujtim Cakrani për gazetarët. Prokurorët janë pjesë e Strukturës së Posaçme Kundër Korrupsionit dhe Krimit të Organizuar (SPAK), që merret me çështje që përfshijnë zyrtarë të lartë politikë dhe shtetërorë.
Meta, 56 vjeç, themelues i Partisë së Lirisë me prirje të majta, u arrestua në tetor.
Në një postim në Facebook, Meta shkroi: “Mezi po pres nisjen e gjyqit që do të jetë publik dhe do t’i tregojë botës” se SPAK është një kukull e kryeministrit Edi Rama. Ai shtoi gjithashtu se e konsideron SPAK-un si “forcën goditëse anti-opozitë” të Ramës.
Partia Socialiste në pushtet e Ramës fitoi me shumicë dërrmuese zgjedhjet parlamentare të 11 majit, duke marrë 83 nga 140 vende në Kuvend.
Meta, që ka qenë president nga viti 2017 deri në vitin 2022, ka qenë kritik i zëshëm i Ramës dhe e ka quajtur këtë çështje një sulm politik të motivuar ndaj një lideri opozitar.
Nëse shpallet fajtor, Meta përballet me një dënim deri në 12 vjet burg,” shkruan gazeta.
