Elmas Bogdani
Gjatë vitit 2024, Struktura e Posaçme Kundër Korrupsionit dhe Krimit të Organizuar (SPAK) ka intensifikuar ndjeshëm përpjekjet për të goditur krimin ekonomik dhe korrupsionin në nivelet më të larta të administratës dhe politikës shqiptare. Sipas raportit të kësaj strukture, po zbërthehen 553 telefona të sekuestruar, kompjuterë, USB, hard disqe, laptopë, karta memorie, dronë dhe pajisje GPS. Pra një arsenal i tërë i të dhënave potencialisht të rëndësishme për hetimet në zhvillim. Në raportin zyrtar të SPAK theksohet se: “Gjatë vitit 2024 nga ekspertët e këtij sektori janë realizuar 293 akte ekspertimi, ku janë ekzaminuar 520 prova digjitale në total dhe konkretisht 344 telefona celularë, 58 kompjutera, 2 DVR dhe 116 prova të tjera digjitale (si hard disqe, USB, karta memorie, CD/DVD, etj.).
Burime bëjnë me dije se mes personave që janë vënë në fokusin e hetimeve përfshihen drejtorë institucionesh shtetërore, biznesmenë të fuqishëm, si dhe figura të rëndësishme politike duke përfshirë edhe deputetë aktualë, ministra dhe ish-ministra. Sasia dhe larmia e pajisjeve të sekuestruara tregon për një përmasë të gjerë të hetimeve, që prek shtresat më të larta të pushtetit dhe ekonomisë në vend. Përdorimi i teknologjisë në këto hetime ka qenë vendimtar. Pajisjet e sekuestruara janë çelësi për të deshifruar rrjetet e komunikimit, transaksionet e dyshimta, dhe ndoshta për të zbardhur lidhje të mundshme midis funksionarëve të shtetit dhe krimit të organizuar. Të dhënat digjitale tashmë përbëjnë një provë me rëndësi themelore në çështjet e korrupsionit dhe pastrimit të parave.
Paniku nga hetimet e SPAK
Kujtojmë se për SPAK mjaftoi zbërthimi i një iPhone 5 që kishte përdorur vite me parë Monika Kryemadhi për të zbuluar qindra mesazhe të shkëmbyera mes saj dhe dhjetëra personave të tjerë, përfshirë dhe zyrtarë të lartë institucionesh apo biznesmenë që mbushën me prova dosjen për të fundosur deputeten dhe ish-presidentin Ilir Meta, i cili prej disa muajsh ndodhet në burg me urdhër të Prokurorisë së Posaçme. Gjithashtu mesazhet në celular i bënë gropën edhe Ahmetajt dhe gjithashtu rënduan pozitat e Erion Veliajt. Këto aksione të SPAK kanë futur në panik gjithë pushtetarët, të cilëve iu është sekuestruar telefoni në kuadër të hetimeve që ende vazhdojnë. Frika u ndje deri te kryeministri Edi Rama. Pas arrestimit të Erion Veliajt, Rama kërcënoi SPAK duke thënë se nuk do të lejojë që t’i merret celulari. “Ta përdorin pavarësinë për të bërë drejtësi dhe jo politikë. Kur them politikë është kjo: meqë njërin po e lëmë në ballkon, të kapim 3 nga këta të tjerët.
Meqë kapëm kryetarin e Bashkisë, të kapim dhe këtë tjetrin për diplomë. Të përfundojë njeriu në SPAK për diploma…Çfarë është kjo? Në këtë kuptim e kam kur them politikë. Ndjekin mediet, kompleksohen dhe bëjnë balet. Dhe mos të bëjnë gabim të kërkojnë telefonin tim sepse boll i kanë, kanë mbledhur të gjithë telefonat e Shqipërisë atje. Të merren me faktet”, është shprehur Rama. këtë mënyrë, Rama po tregon se nuk është vetëm Veliaj ai që mund të ketë probleme ligjore, por ai vetë mund të jetë i përfshirë në një rrjet më të gjerë hetimesh. SPAK po tregon se nuk do të ndalet nga asnjë kërcënim dhe presion. Sekuestrimi masiv i pajisjeve digjitale është një sinjal i qartë se drejtësia e re shkojë deri në fund për të zbardhur korrupsionin që ka gërryer institucionet për vite me radhë. Nëse këto hetime do të përkthehen në ndjekje penale të suksesshme dhe dënime, kjo mbetet për t’u parë. Por mesazhi tashmë është i qartë: askush nuk është mbi ligjin.
