Gjykata e Posaçme e Apelit ka vendosur të shtyjë për në datën 14 maj seancën e shqyrtimit të ankimit të paraqitur nga SPAK ndaj vendimit të gjyqtares Flora Hajredinaj, e cila kishte urdhëruar nisjen e hetimeve ndaj ish-ministres Olta Xhaçka dhe bashkëshortit të saj, Artan Gaçi, për veprat penale të shpërdorimit të detyrës, falsifikimit të dokumenteve dhe pastrimit të parave.
Shkak për shtyrjen e seancës, sipas njoftimit zyrtar të gjykatës, ishte mungesa në sallë e kallëzuesit, Fredi Beleri. Ndërkohë, përfaqësuesit ligjorë të Belerit kishin dërguar një shkresë në adresë të Apelit të Posaçëm, duke argumentuar se zhvillimi i gjykimit me seancë publike përbën një shkelje të procedurës, pasi sipas tyre, çështja duhet të ishte trajtuar në Dhomë Këshillimi.
Seanca e radhës pritet të përcaktojë nëse SPAK do të detyrohet të nisë hetimet ndaj çiftit Xhaçka–Gaçi, siç urdhëroi gjyqtarja Hajredinaj, apo nëse ankimi i SPAK do të pranohet dhe vendimi do të rrëzohet.
Kujtojmë se pasi Gjykata e Posaçme urdhëroi SPAK të regjistrojë procedim penal për ish-ministren Olta Xhaçka dhe për bashkëshortin e saj Artan Gaçi, organi i akuzës ka ankimuar vendimin në Apelin e Posaçëm Antikorrupsion.
Prokuroria e Posaçme tha se ka kryer veprime të shumta hetimore, të cilat kanë konsistuar ndër të tjera edhe në veprimtarinë e kryer nga shtetasi Artan Gaçi në kuadër të bashkëpunimit të supozuar apo dhe qoftë dijenisë së tij rreth ekzistencës së dokumenteve të falsifikuara, nëpërmjet të cilëve është përfituar trualli.
