Agjencia e lajmeve Presheva.com, me rastin e zgjedhjeve presidenciale në Serbi, ka vendosur të marrë një opinion të përgjithshëm të qytetarëve shqiptarë që jetojnë në këtë trevë. Sipas pyetësorit, shqiptarët të cilët jetojnë në jug të Serbisë shprehen se duke u nisur nga parimi i zgjedhjeve, që janë shprehje e sovranitetit.
Po ashtu, sipas tyre zgjedhjet e drejta demokratike nuk mund të arrihen pa ushtrimin e vazhdueshëm të një vargu të gjerë të të drejtave të tjera humane dhe fundamentale, duke përjashtuar diskriminim e bazuar në racë, ngjyrë, gjini, gjuhë, religjion, politikë apo mendime tjera, origjinë nacionale apo sociale, pasuri, lindje apo status tjetër, përfshirë këtu edhe paaftësitë, si dhe pa kufizime arbitrare dhe jo të arsyeshme.
Sipas qytetarëve shqiptarë të Luginës së Preshevës zgjedhjet duhen bojkotuar për këto arsye:
► Sepse legjitimojnë pushtimin serb në këtë rajon, sepse pa vullnetin tonë gjendemi nën okupimin serb, që me të padrejtë na mohohet Referendumi për shkëputje dhe bashkim me Kosovën, çka do të thotë se na mohohet parimi bazë; ai i vetëvendosjes;
► Sepse legjitimojnë dhunën dhe terrorin shtetëror serb gjatë periudhave të ndryshme të historisë që kjo popullatë ka përjetuar;
► Sepse nuk gëzojmë asnjë të drejtë elementare duke filluar që nga liritë civile-politike që janë të parashikuara në Konventat Ndërkombëtare për të Drejtat e Njeriut;
► Sepse vazhdon dhuna dhe terrori shtetëror ndaj kësaj popullate autoktone edhe sot e kësaj dite;
► Sepse para bashkësisë ndërkombëtare, ne, shqiptarët po e vendosim shtetin serb në një pozitë të favorshme. Gjerësisht shteti serb po arsyetohet me pretekstin se shqiptarët kanë të drejtat e tyre dhe në këtë formë po i shmanget presioneve ndërkombëtare, duke i mohuar të drejtat tona;
► Sepse do të na shkonte në interesin tonë kombëtar me një paralelizëm institucional që të ruajmë bazën tonë kombëtare shqiptare, atë të popullatës sonë shumicë që të mos shpërngulet, dhe mekanizmat ndërkombëtarë do t’i vendosim në lëvizje;
► Sepse shtetit serb do t’ia bëjmë me dije se po shkel Kushtetutën e Kosovës, duke mbajtur zgjedhjet e saj edhe në territorin e Kosovës, dhe t’i jepet fund manipulimit të komunitetit serb në Kosovë nga shteti serb;
► Sepse duhet krijuar vetëdija edhe tek popullsia jonë në Luginë që të jemi më këmbëngulës për të drejtat tona që na takojnë.
