Pas përfundimit të rinumërimit të kutive në Tiranë dhe Fier, sot në orën 09:00 në Pallatin e Sportit “Farie Hoti” pritet të nisë procesi i rihapjes së 290 kutive të votimit të qarkut Durrës, përfshirë edhe votat e diasporës për këtë zonë zgjedhore.
Në këtë qark zhvillohet një betejë e fortë mes Aulon Kalasë dhe Arjan Ndojës. Ky i fundit rezultoi fillimisht fitues me 1047 vota epërsi, por Kalaja ka kërkuar rinumërim të plotë të kutive dhe verifikim të pamjeve filmike, duke pretenduar se ka pasur transferim të votave brenda listës së partisë
Pavarësisht se nuk mori mbështetjen zyrtare të Partisë Demokratike, Kalaja është mbështetur në kërkesën e tij nga Partia e Lëvizjes së Legalitetit, pjesë e koalicionit PD–ASHM.
Ai protestoi edhe një ditë më parë përpara Pallatit të Sportit, duke kërkuar transparencë dhe korrektësi nga KAS, si dhe këqyrjen paralelisht të videove të qendrave të numërimit.
Rinumërimi në Durrës pritet të jetë vendimtar për fatin e mandatit, duke marrë parasysh zhvillimet surprizë në qarqe të tjera. Kujtojmë se një ditë më parë, pas përmbysjes së rezultatit në Fier, Zegjine Çaushi humbi mandatin përballë Maldrita Bardhos me vetëm 10 vota diferencë – por në një lëvizje të papritur në mbrëmje, Bardho u tërhoq, duke ia rikthyer mandatin koleges së saj.
Tashmë mbetet për t’u parë nëse Kalaja do të arrijë të përmbysë epërsinë e Ndojës dhe të rifitojë mandatin nëpërmjet procesit të rinumërimit.
