Teksa në Athinë është planifikuar një manifestim i madh të dielën kundër negociatave për emrin e Maqedonisë, shumica e maqedonasve kërkojnë që kjo çështje të marrë zgjidhje përfundimtare.
Në një anketim të institutit “Societas Civilis” në Shkup, 61 % e maqedonasve mbështesin negociatat që po zhvillohen me Athinën. Mbështetësit më të mëdhenj janë shqiptarët, 95% e të cilëve kërkojnë që zgjidhja e konfliktit me Greqinë, t’i hapë rrugë anëtarësimit në NATO e BE.
Kryeministri maqedonas Zoran Zaev kërkoi mbajtjen e një referendumi, duke shprehur bindjen se shumica e maqedonasve mbështesin zgjidhjen e çështjes së emrit.
Por mediat në Greqi shkruajnë se Ministri i Jashtëm i këtij vendi, Nikos Kozias kishte zhvilluar një bisedë telefonike të tensionuar me ndërmjetësuesin ndërkombëtar Methju Nimiç. Kozias ishte shprehur se Nimiçit nuk i takonte të fliste për politikat e Athinës.
Gjatë vizitës në Shkup, Nimiç u shpreh se pala greke nuk i kishte shtruar për diskutim në asnjë moment identitetin e popullit maqedonas.
