Sokol Cikalleshi, me anë të një reagimi në rrjetin social “instagram”, ka bërë të ditur edhe emrin e klubit të tij të ri. Sulmuesi shqiptar, që ishte pjesë e skuadrës së Goztepe deri më tani, ka treguar se përfundimisht do të jetë pjesë e ekipit të Akhisarspor. Ky është ekipi që Cikalleshi ka luajtur më herët, teksa në rrëfimin e tij shterues, ka treguar dhe arsyet e largimit nga Goztepe, ndërsa ka bërë të ditur dhe pse nuk ka shkuar te Osmanlispor.
“Unë tashmë nuk jam më pjesë e klubit të Goztepe. Unë dhe menaxheri im vendosëm të shkëpusim marrëdhëniet profesionale me mirëkuptim me klubin për 2 arsye: E para, pasi hapësirat e mia për të luajtur ishin të pakta dhe për shumë arsye kjo vazhdoi shumë gjatë. E dyta, u hap drita jeshile për të lëvizur te cilido klub në Superligë në merkaton e janarit.
Faleminderit Goztepe për bashkëpunimin edhe pse të shkurtër që kaluam bashkë. Që nga sot me shumë lumturi bëj me dije, që mes 3 ofertave që kisha, zgjodha ekipin ku ndjehem si në shtëpi, që më hapi dyert pa hezitim për të më bërë pjesë të tijin, Akhisarspor.
Presidenti i ekipit bleu përfundimisht kartonin tim nga klubi Osmanlispor dhe bashkë firmosëm një kontratë 3.5 vite. Falënderoj klubin Osmanlispor për gjetjen e gjuhës së përbashkët dhe i uroj suksese të mëtejshme. Jam shumë i uritur për të luajtur dhe po pres me padurim të zbres në fushë për ekipin tim të ri. Sokol Cikalleshi”-shkruan sulmuesi.
