Të tjera detaje janë bërë të ditura lidhur me shembjen e urës në Xhenova të Italisë, ndërsa në dritë ka dalë edhe emri i kompanisë, e cila e ka ndërtuar. Behët fjalë për kompaninë Condote SPA, e cila ka ndërtuar këtë urë, por 5 muaj më parë kjo kompani ishte e përfshirë në një skandal korruptiv në Itali.
Mediat italiane shkruajnë se 6 persona përfunduan në pranga, ku në mesin e tyre ishte edhe Presidenti i kompanisë Duçio Astaldi dhe disa zyrtarë, nën akuzë për afera korruptive dhe abuzim me detyrën në lidhje me ndërtimin e tre pjesëve të autostradës Sirakuza – Xhela.
Hetimet e Prokurorisë së Mesinës, kanë zbuluar se Komisioni i Vlerësimit të Ofertave kishte kryer disa procedura fiktive, pasi e kishte përcaktuar fituesin më parë.
Kompania Kondote është një ndër më të mëdhatë në Itali dhe ka ndërtuar dhjetëra vepra të mëdha infrastrukturore.
Ajo ka fituar kontrata ndërtimi edhe në vende të tjera të Evropës. Një nënkompani e saj operon edhe në Shqipëri. Kompania INSO ka firmosur një kontratë për ndërtimin e një spitali të ri 7-katësh në Qendrën Spitalore Universitare Nënë Tereza, me vlerë 14.4 milionë Euro, gjatë një vizite të kryer në Tiranë nga drejtori ekzekutiv Frabricio Puçareli, raporton Tv Klan.
Një tjetër kontrate me vlerë 9.6 milionë Euro u firmos po në Gusht të vitit 2017 për rikonstruksionin e Spitalit të Kirurgjisë, duke e çuar në 25 milionë vlerën e punimeve që kjo kompani do të kryejë në Shqipëri.
