GJKKO vendosi dje që të lërë në burg kryebashkiakun e Tiranës, Erion Veliaj dhe biznesmenin Elman Abule, ndërsa ndryshoi masën për bashkëshorten e tij, Ajola Xoxa, nga arrest shtëpie në detyrim parqitje, dhe në të njëjtën masë edhe biznesmenët e tjerë.
Gazetarja Klodiana Lala në emisionin “Të Paekspozuarit” në MCN TV dha detaje nga seanca e gjatë e nisur që në mëngjes dhe që përfundoi në orën 22.00 të ditës së djeshme.
“Seanca nisi në 08:30, Veliaj bashkë me Elman Abulen u shoqëruan nga Blloku i Sigurisë në gjykatë, ndërkohë që zonja Xoxa mbërriti e shoqëruar nga oficerë policie. Biznesmenët janë në “detyrim paraqitje”. U ndërpre sepse avokatët kërkuan të njihen me aktet. Janë 66 fashikuj të depozituar, dosje mjaft voluminoze.
Deri në mbrëmje, ishin zyrtarë të lartë të Bashkisë, vartës të Veliajt, që mbajtën tubim.
Nga njëra anë bëhej thirrje për lirimin e Veliajt, por nga ana tjetër të burgosurit thërrisnin “Hajde këtu Erion Veliaj, je hajdut!”. Më pas rifillon seanca, ka patur debate të forta mes Veliajt dhe prokurorit të posacëm, Olsi Dado, të cilin e kishte etiketuar si person që e përndjek, pervers, lunatik, etj, thuajse të njëjtin qëndrim ka mbajtur në sallën e gjyqit, ka thënë po përndiqni bashkëshorten time, etj. Prokurori i ka tërhequr vëmendjen që t’i përmbahet provave. Në orën 22, gjykata e la në fuqi masën e sigurisë për zotin Veliaj dhe të lehtësojë masën për zonjën Xoxa në detyrim për paraqitje dhe ndalim për të dalë jashtë vendit. Vetëm njëri nga biznesmenëve nuk u njoh me masën dhe ka komunikuar me SPAK se ku do të kthehet nga jashtë vendit.
Media nuk u la të futet brenda, as të kapërcejmë pragun, për të shmangur ndonjë foto.
Gjatë qëndrimit zoti Veliaj nuk ka patur problematika me policinë, i është ofruar vetëm ujë. Ka patur tension në ajër.
Në momentin që po dilte furgoni mbështetësit e tij e bllokuan, derisa ndërhyri policia.
Kishte edhe zyrtarë të bashkisë, artistë e me radhë”- tha Lala.
Lala shpjegoi në studio edhe argumentet që përdori gjykata për të mos ndryshuar masën për Erion Veliajn.
“Argumenti thelbësor që gjykata ka përdorur për masën arrest me burg, është një dhe i vetëm. Gjykata thotë se ekziston rreziku potencial, që zoti Veliaj intimidon dëshmitarët dhe mund të “helmojë” provat, sepse ka mesazhe të tij të drejtuara drejt zyrtarëv të BKH duke i intimiduar me qëllim që të mos marrin në pyetje bashkëshorten dhe vartësin, pra në këto kushte që Veliaj ka pushtet politik dhe ekonomik, lidhje te fuqishme, imagjino kur e bën me njerëzit e drejtësisë, merreni me mend si mund të sillet me dëshmitarët në këtë proces. Pra kjo është përdorur për masën arrest në burg.
Zoti VEliaj ndërkohë që ishte nën hetim, për korrupsion dhe pastrim parash, prokurorët pretendojnë se ai ka dërguar mesazhe direkte ndaj hetuesve të BKH, madje bashkëshortja bashkë me Klotilda Bushkën kanë kërcënuar dhe intimiduar dëshmitarë. Zonja Xoxa ka marrë telefonin e ish-vartëses dhe ka kërkuar që ajo të thotë se nuk mban mend asgjë. Ky është argumenti kryesor për masën e sigurisë”
Ndërsa gazetarja Ola Xama u shpreh se edhe pse nën hetim, pagesat kanë vijuar “Është edhe flagranca, sepse gjatë hetimeve, ka patur pagesa edhe gjatë vitit 2024 kundrejt shoqatave dhe kompanive të lidhura me Xoxën, pra hetimi nuk kishte ndalur vjedhjen e parasë publike”.
