Besarta Gashi, bashkë me të bijën Leonidën, nëntë vjeçe, kanë qenë shumë afër vendit, ku një sulmues hyri me kamion në turmën e njerëzve, në Stokholm.
Ishte vetëm 15 minuta para kur Besarta 31 vjeçe bashkë me vajzën e saj, ishin në Ahlens, në qendër të kryeqytetit suedez, shkruan Expressen.se, transmeton Klan Kosova. Ajo ka treguar se në momentet e sulmit ka pasur shumë njerëz që gjendeshin në “Queen Street”.
“Më tha vajza: nënë a mund të më blesh ‘hot dog’. Në ato momente sulmuesi hyri në turmën e njerëzve”, ka thënë Besarta Gashi, me origjinë nga Kosova.
Nga aty, ajo ka thënë se ka dëgjuar piskamat e njerëzve duke thirrur se “ka një bombë e cila është në një kamion”.
“Diçka shpërtheu. Njerëz gjithandej, sigurimi, të gjithë bërtisnin “Vraponi”. Dikush thoshte ‘bomba’. Dikush thoshte ‘gaz’”, ka thënë ajo. “Dëgjuam britma. Filluam të vrapojmë, por nuk e dinim se nga erdhi. Vetëm e kemi parë se kamioni kaloi pranë nesh për një fije floku. Kërceva, u largova dhe e tërhoqa vajzën time”.
Ajo ka treguar se kanë qenë shumë afër, duke rrëfyer tmerrin e sulmit që u krye mbi njerëz të pafajshëm.
“Kurrë nuk do ta harrojë pamjen që ishte para meje. Kamioni kaloi mbi njerëz. Shihja pjesë që fluturonin. Shumë tjerë ishin të shtrirë përtokë. Ishte një vajzë që ishte nën kamion dhe s’mund të ikte. E bija ime ishte pikëlluar dhe po ndjente frikë”, tha ajo.
Besarta jashtë kishte dalë për të bërë një kontroll mjekësore, pasi është shtatzënë.
