Është ndarë nga jeta, mesditën e djeshme, kantautori i madh shqiptar Francesk Radi. Artisti i njohur ndërroi jetë në moshën 68-vjeçare në Qendrën Spitalore “Nënë Tereza”, pasi pësoi hemorragji cerebrale.
Kantautori është shtruar në siptal mëngjesin e 27 marsit, ndërsa gjithë këto ditë, bashkëshortja e tij, gazetarja e njohur Tefta Radi, ka bërë apel për transportimin e tij jashtë shtetit.
Kush është Françesk Radi
Ai ka kryer Liceun Artistik dhe më pas Akademinë e Arteve në Tiranë.
Për një periudhë të gjatë kohe ka punuar në Estradën e Shtetit me instrumentin e kitarës, por, njëkohësisht edhe si kantautor. Në vitin 1992 ai ka filluar punë në Radio Tirana si solist, instrumentist. Gjatë kësaj kohe ka kompozuar dhe kënduar shumë këngë në festivalet e ndryshme.
Në fillimet e tij me krijimtarinë muzikore solli për publikun, këngët “Adresa” dhe “Biçikleta”, dhe që nga ai moment Françesk Radi u bë një emër i vlerësuar.
Ishin pikërisht dy këngët e tij të para të realizuara në vitet ’70, që bënë që krijimtaria e tij artistike të niste rrugëtimin drejt suksesit muzikor. Kënga “Adresa” dhe “Biçikleta” kanë qenë edhe videoklipet e para shqiptare në këngë, të xhiruar në vitin 1972.
Më pas krijimtaria e tij muzikore do të shënonte sërish një tjetër kulm pas viteve ’90, duke sjellë disa krijime për publikun. Përmendim këtu këngët “Rroku i burgut”, “Humba pranverën”, “Telefonatë zemrash”, “Zemër e lodhur”, “Ky fat na ra”, “Kemi dasëm ‘o” etj., të cilat kanë mbetur në kujtesën e publikut.
