Një sëmundje e rëndë i ka marrë jetën të atit të kryeministrit të Kosovës, Ramush Haradinaj. Lajmin për vdekjen e Hilmi Haradinajt e ka dhënë i biri, Ramushi. Mësohet se babai i kreut të qeverisë kosovare, ka pasur probleme shëndetësore prej disa kohësh.
“Të dashur miq,
Ju njoftoj se sonte, pas një sëmundjeje të rëndë, ka ndërruar jetë babai ynë, Hilmi Haradinaj.
Varrimi i të ndjerit bëhet të hënën, më 18 Qershor, ora 14:00, në Gllogjan.
Të ndjerit Dritë i pastë shpirti!”, shkruan në Facebook.
Një mesazh ngushëllimi është përcjellë edhe nga presidenti Meta:
“Me hidhërim të madh mësova lajmin e ndarjes nga jeta të Hilmi Haradinajt, këtij patrioti të madh të luftës çlirimtare të Kosovës, babai i dy heronjve të UÇK-së, Luanit dhe Shkëlzenit, që dhanë jetën për lirinë e Kosovës, i cili shtëpinë e familjen e tij e ktheu në kështjellë të pamposhtur të qëndresës dhe luftës për liri kombëtare.
Ai ishte një burrë i traditës, mikëpritjes dhe atdhedashurisë. Kam pasur fatin e madh ta njoh nga afër dhe të ndjej mikëpritjen bujare të këtij njeriu të madh.
Ngushëllime të thella familjes Haradinaj, të afërmve dhe miqve të tij të panumërt. Shpirti i tij u Prehtë në paqe!”.
