Pothuajse të gjitha gazetat në Beograd kanë pasqyruar në numrin e sotëm mbledhjen e djeshme të dy qeverive shqiptare. Gazeta “Alo” ka shkruar rreth bashkimit të Kosovës dhe Shqipërisë. “Shqiptarët në 2025 bëhen një shtet”, shkruan kjo media.
Ndërsa gazeta “Novosti” shkruan se “Nuk ka asnjë bazë për Shqipërinë e Madhe”. Gazeta gjithashtu shkruan se qeveria e Tiranës provokoi Serbinë duke i bërë akuza të pavërteta.
“Rama në mbledhjen e dy qeverive akuzoi Serbinë për agresion ndaj të ashtuquajturës “Kosovë”. Të dyja palët bashkojnë doganat dhe lehtësojnë kalimet kufitare”, shkruan “Novosti”.
Mbledhja e dy qeverive Shqipëri-Kosovë u finalizua me arritjen e 9 marrëveshjeve, të cilat do të kenë ndikim në regjimin doganor dhe bashkëpunimin ekonomik mes dy shteteve.
Brenda 6 muajve pritet të bëhet unifikimi doganor, duke eleminuar kontrollet e dyfishta dhe tarifat mes shqiptarëve në dy krahët e kufirit dhe po ashtu zerim i taksave.
“Kurir”
Ndërsa “Kurir” e quan një “Skandal” atë që ndodhi në Pejë mes dy qeverive.
“Edi Rama dhe Ramush Haradinaj, kryeministri shqiptar dhe ai kosovar, shënuan aktin përfundimtar në krijimin e një Shqipërie të Madhe. Të dy ata u mblodhën dje në Pejë me kabinetin e qeverive të tyre dhe pas një sesioni të përbashkët, ata thanë hapur se janë në lëvizje për të realizuar ëndrrën e unifikimit të Shqipërisë dhe Kosovës”, shkruan “Kurir”.
Sipas “Kurir” e gjitha mbledhja ishte një provokim i hapur për Serbinë.
“Rama vazhdimisht fliste për Serbinë, duke përdorur dhe shprehjen “What the fuck”.
Por, pas këtyre marrëveshjeve, reagoi dhe ambasadori amerikan në Beograd Kyle Scott. Heqjen e tatimit për Shqipërinë dhe shtimin e taksave për Serbinë, Skot i konsideroi si vendime diskriminuese.
Kyle Scott: “Kosova është një shtet i vetëm dhe vendosja e një tarife diskriminuese në njërën anë të vendit kundër pjesës tjetër të vendit është një propozim tepër i pazakontë”.
