Shtyhet përsëri seanca paraprake në ngarkim të kryebashkiakut të Tiranës Erion Veliaj dhe të pandehurve të tjerë. seanca është shtyrë për në datën 2 shkurt.
Gjykata e Posaçme kundër Korrupsionit dhe Krimit të Organizuar (GJKKO) në seancën e sotme vendosi ta mbyllë shqyrtimin, duke i konsideruar si abuzive kërkesën e avokatëve dhe mungesë vullneti për të paraqitur prapësimet dhe rrëzoi kërkesën e avokates së vendosur kryesisht të kryebashkiakut Veliaj, që të merrte kohë për t’u njohur me aktet dhe lejen që ta takonte klientin e saj në burg.
Seanca e sotme ka nisur në orën 11:30, ku Gjykata e Posaçme kundër Korrupsionit dhe Krimit të Organizuar (GKKO) ishte parashikuar të mbrojtjen ndaj akuzave të SPAK-ut për tre të hetuarit e fundit, përfshirë kryebashkiakun Veliaj dhe bashkëshorten e tij, Ajola Xoxa.
Avokati mbrojtës Artan Gjermeni, për të cilën Veliaj ka kërkuar të revokohet, doli në një prononcim të shkurtër për mediat, ku konfirmoi se sot kryebashkiaku kishte kërkuar të njihet personalisht me aktet e dosjes.
“I pandehuri të njihet personalisht me aktet në dosje, ose fizikisht me letër të printuar, ose me akt elektronik. Asnjë nga këto mundësi, nuk mundësohet për shkak se drejtoria e Përgjithshme e Burgjeve nuk e mundëson këtë pa një urdhërim të organit përkatës.”, tha Gjermeni.
Ai sqaroi se do vijojë të paraqitet në seanca, derisa avokatja e caktuar kryesisht Valentina Teodoresku të nisë funksionet.
“Termi shkarkim nuk është term juridik, secili ka të drejtë ta revokojë avokatin, por avokati i tij vijon në detyrë derisa të fillojë funksionet avokatja e caktuar kryesisht. Në momentin që ajo vijon funksionet unë nuk jam.”, shtoi ai. Gjermeni u shpreh se që nga momenti kur kryetari i bashkisë ka kërkuar revokimin e tij dhe deri sot, nuk ka pasur asnjë kontakt me Veliajn.
Sjellim ndërmend se seanca e kaluar u shty për shkak të mungesës së Erion Veliajt. Avokatët e tij thanë para Gjykatës së Posaçme se Veliaj donte të ishte i pranishëm dhe kishte pritur prej mëngjesit furgonin e shoqërimit në ambientet e paraburgimit të Durrësit.
Ky i fundit ka shkuar pak minuta para orës 9:00, teksa seanca ishte planifikuar të niste në orën 9:00, kur edhe u bë apeli për prezencën e palëve. Mungesa e Veliajt pa një deklaratë për vullnetin e tij nëse do të ishte apo jo i pranishëm e bënte të pamundur vijimin e seancës.
Por pretendimet e ngritura nga avokatët se nuk është shoqëruar në ambientet e gjykatës u mohuan nga Drejtoria e Përgjithshme e Burgjeve, që i cilësoi si të pavërteta.
