Dokumentet e publikuara nga Shtëpia e Bardhë zbulojnë miliona dollarë pasuri nën zotërimin e stafit të lartë.
Vajza e presidentit Trump, Ivanka, dhe bashkëshorti i saj Jared Kushner, kanë asete që vlerësohen midis 240 dhe 740 milionë dollarëve.
Kjo përfshin edhe aksione në Trump International Hotel, që i solli Trump-it, fitime mes 1 dhe 5 milionë dollarë vitin e kaluar.
Dokumentet financiarë të publikuar një ditë më parë, gjithashtu detajojnë rrogat e figurave të profilit të lartë në administratë. Rregullat etike kërkojnë publikimin e financave për stafin që punon në Shtëpinë e Bardhë.
Dokumentet tregojnë të ardhurat dhe pasuritë në kohën kur ata kanë filluar të punojnë për qeverinë amerikane – përpara se këto asete të shiten apo të asgjësohen. Sidoqoftë, as presidenti Trump dhe as zv/presidenti Pence nuk ishin pjesë e këtij raporti.
Mediat amerikane kanë publikuar listën e vlerave të pasurisë, ku bie në sy, mungesa e shifrave konkrete.
Të përfshirë janë edhe emra, si: Steve Bannon, tashmë këshilltar i lartë i Shtëpisë së Bardhë me pasuri midis 3.3 dhe 12.6 milionë dollarë; sekretar për shtypin Sean Spicer, i cili numëron një sërë pasurish të patundshme; këshilltarja e fushatës së Trump, Kellyanne Conway, e cila fitoi mëse 800.000 dollarë për shërbime këshillimi. Zyrtarë të Shtëpisë së Bardhë kanë theksuar faktin se këto nuk janë pasuritë aktuale të stafit, por çfarë ata zotëronin përpara se të merrnin detyrën.
Sipas mediave amerikane, zyrtarët në administratën e Trump rezultojnë shumë herë më të pasur se zyrtarët në administrata të mëparshme, përfshi edhe Shtëpinë e Bardhë të ish-presidentit Barack Obama.
