Ardhja e 600 mijë refugjatëve në Shqipëri, kanë nxehur gjakrat sot në Komisionin Parlamentar të Sigurisë, ku deputeti demokrat Flamur Noka ka vënë alarmin. Reagimi i tij pason pas atij të Zëvendës Ministrit të Brendshëm, Julian Hodaj, ku gjatë një interviste për median gjermane ZDF, konfirmoi se Shqipëria mund të strehojë 600 mijë emigrantë sirianë.
“Shqipëria ka kapacitetet dhe eksperiencë për të strehuar deri në 600 mijë emigrantë sirianë. E ka treguar këtë edhe në të kaluarën, gjatë luftës së Kosovës”.
“Rama pranon 600 mijë refugjatë sirianë në Shqipëri, vetëm t’i hapen negociatat”
Ajo çfarë shtoi edhe më shumë kërshërinë, lidhet me qëndrimin e zv.ministres së Brendshme, Elona Gjebrea, se pavarësisht se është thënë se vendi ynë i ka kapacitetet, ende nuk janë përcaktuar shifrat.
Por Noka ka shprehur rebelimin e tij, duke thënë se në Shqipëri mafia e qenieve njerëzore do të veprojë pa problem.
“Nuk po përhapim panik, por po përpiqemi të parandalojmë të keqen. Është bërë gati mafia e qenieve njerëzore të veprojë në Shqipëri.
Janë 300 skafe të mafias, gati për një biznes shumë fitimprurës të qenieve njerëzore. Shqipëria do të bëhet vend i pajtueshëm. Nesër, pasnesër, këtu shumica do jenë irakien, sirianë dhe shqiptarët në pakicë. Si moj zonjë thua panik kur kanë ikur 500 mijë shqiptarë?!
Të vika keq që ne themi se këtu do vijnë 600 mijë vete nga vendet islamike. Ky vend do të kthehet në arene të qenies njerëzore. Vetëm për shqiptarë s’do të ketë vend për të jetuar këtu. A merr vesh moj vajzë, apo jo? Nipërit tanë s’do flasin më shqip me këtë që doni t’i bëni vendit”, tha Flamur Noka.
Në një reportazh të kanalit gjerman, ku flitet mbi planin e qeverisë austriake për ngritjen e një kampi emigrantësh në një vend të Ballkanit Perëndimor, jo anëtar i BE, Hodaj shpjegon se Shqipëria është e sprovuar në përballimin e situatave të jashtëzakonshme të emigrantëve. Hodaj sjell në vëmendje rastin e shpërnguljes në vendin tonë të kosovarëve gjatë kohës së luftës, në vitin 1999.
Shqipëria, Maqedonia, por edhe Kosova, përmenden si alternativa për stacionimin e emigrantëve, nëpër kampe të ngritura nga BE.
