Shqipëria ka fituar të drejtën për të organizuar Europianin U-21 në vitin 2027, së bashku me Serbinë. Këtë lajm e ka komentuar edhe trajneri i Partizanit, Aleksandër Veselinoviç, i cili e ka cilësuar si një zhvillim të shkëlqyer për të dy vendet.
Veselinoviç theksoi se ky është një mundësi e madhe për aspektin sportiv dhe ekonomik dhe se duhet mbështetur në maksimum. Veselinoviç beson se ky eveniment do të tërheqë vëmendje ndërkombëtare, duke e bërë Shqipërinë dhe Serbinë të njohura më shumë në botën e futbollit. Ai gjithashtu shprehu optimizëm për përmirësimin e infrastrukturës sportive në dy vendet, duke përmendur ndërtimin e stadiumeve të reja në Serbi dhe riformatimin e atyre në Shqipëri.
Në lidhje me Kupën e Shqipërisë, Veselinoviç foli për ndeshjen që Partizani do të luajë me Laçin. Ai e cilësoi kundërshtarin si një ekip të fortë, veçanërisht në fushën e vet, dhe theksoi rëndësinë e fokusimit maksimal për të kaluar këtë fazë të Kupës. Për trajnerin, dy ndeshjet e mundshme, që mund të arrijnë deri në 200 minuta, kërkojnë përgatitje të kujdesshme dhe përqendrim.
Po ashtu, ai komentoi edhe merkaton e janarit, duke shprehur kënaqësinë që ajo është mbyllur dhe duke siguruar mbështetje për lojtarët që tashmë janë pjesë e skuadrës. Ai vlerësoi se çdo lojtar ka potencialin për të kontribuar dhe për t’i dhënë forcë Partizanit në luftën për tituj.
Ndeshja Laçi-Partizani është programuar të luhet ditën e mërkurë, duke nisur nga ora 13:30.
