Dhjetëra artikuj janë shkruar për plazhet, malet dhe vendet turistike që vendi ynë ka. Prestigjozet nga e gjithë bota kanë përshkruar mes rreshtash bukuritë që bregdeti shqiptar ofron për pushuesit duke e cilësuar vendin tonë si “Maldivet e Europës”.
Lart e poshtë thuhej se qeveria shqiptare kishte paguar për këto shkrime, ndërkohë së fundmi ministrja Mirela Kumbaro ka zbuluar vetë se nga arka e shtetit nuk ka dalë asnjë cent për promovimin e vendit tonë në sytë e botës.
Në një intervistë të dhënë për “La Repubblica”, ministrja Kumbaro e pyetur se nëse Shqipëria ka investuar shumë në këtë promovim, tha se Ministrisë së Turizmit nuk i është dashur të shpenzojë për promovimin mediatik.
Sipas ministres blogeret, festivalet verore dhe eventet kanë qenë promovuesit më të mirë të Shqipërisë, të cilët kanë ngjallur kuriozitet te të huajt për ta parë dhe prekur nga afër çdo bukuri të vendit të shqiponjave.
“Turizmi është një ndër prioritetet e qeverisë sonë. Ne i kemi dhënë këtij sektori mundësinë të nxjerrë në pah gjithë potencialin dhe diversitetin. Ndaj njerëz nga e gjithë bota tashmë janë kuriozë, duan të zbulojnë Shqipërinë. Ministrisë sonë nuk i është dashur të shpenzojë asnjë cent për promovim mediatik.
Është meritë e blogerëve, festivaleve verore dhe eventeve, disa me rëndësi historike si p.sh shpallja e lumit Vjosa si Parku i Parë Kombëtar i një lumi të egër në Evropë. Këta kanë qenë promovuesit tanë më të mirë. Mendoj se ky është marketingu më i mirë dhe më i qëndrueshëm”, tha ministrja.
