Një shpërthim i fuqishëm ka ndodhur mëngjesin e sotëm në një pikë karburanti në zonën Prenestino të Romës, duke shkaktuar panik të madh mes banorëve dhe dëme të konsiderueshme materiale.
Pamjet nga vendngjarja tregojnë një top zjarri të madh portokalli dhe një re të dendur tymi gri që mbuloi ndërtesat përreth, ndërsa policia dhe zjarrfikësit ndërhynë menjëherë për të izoluar zonën dhe për të përballuar flakët.
Sipas Corriere della Sera, të paktën 21 persona janë plagosur, përfshirë tetë efektivë të policisë dhe një zjarrfikës. Stacioni i metrosë “Teano”, që ndodhet pranë pikës së shpërthimit, është mbyllur përkohësisht si masë sigurie.
Dëshmitarët okularë raportojnë se ndjenë një erë të fortë gazi para shpërthimit të parë, i cili u pasua nga një tjetër edhe më i fuqishëm. Banorët u detyruan të largohen menjëherë nga shtëpitë e tyre për shkak të frikës së ndonjë shpërthimi tjetër.
“U zgjova nga një shpërthim shumë i fortë, mendova se ishte bombë,” tha një dëshmitar që jeton në zonën e Prenestinos. Një tjetër banor nga Centocelle tha: “Të gjitha dritaret dridheshin, mendova se ishte tërmet.”
Shkaku i shpërthimit mbetet ende i paqartë, ndërsa autoritetet po hetojnë ngjarjen dhe ekipet e emergjencës vijojnë punën për shuarjen e zjarrit.
