Situata e Elseid Hysajt te Napoli duket se çdo ditë po përkeqësohet. Prej disa vitesh ai ishte titullar i padiskutueshëm tek napolitanët, por me ardhjen e Ancelottit si trajner gjërat kanë ndryshuar. Hysaj po e sheh shpesh veten në stol, fillimisht u mendua se ishte e përkohshëm, por tani gjërat janë bërë serioze dhe nuk po aktivizohet në çdo ndeshje.
Nga kjo situatë ka shpërthyer edhe agjenti i shkodranit, Mario Giuffredi. Në qendër të polemikave është e ardhmja e mbrojtësit kuqezi. Giuffredi, që pati mohuar këtë mundësi, tashmë nuk fshihet më. “Në verë, Hysaj mund të shkonte te Chelsea i Sarrit. Ancelotti i tha se e vlerësonte, por faktet tregojnë se në periudhën e fundit nuk është më i rëndësishëm për klubin. Nëse është bërë një rezervë, atëherë jemi gati të largohemi dhe të kërkojmë shitjen që në janar”.
“Nuk vëmë në diskutim zgjedhjet e Ancelottit, por Hysaj nuk e meriton këtë sjellje. Mund të jetë fazë e përkohshme, por duhet sqaruar kjo situatë. Mund të flitet hapur dhe publikisht. Flasim për një nga mbrojtësit e krahut më të mirë në Europë, kjo gjë po e penalizon. Jemi gati të flasim, do të heq Hysajn nga aty nëse na thonë se është bërë rezervë”.
Sa i përket klauzolës, pret shkurt: “Nuk dua të flas për para, vetëm për çështjen e hapësirave”.
