Specialistët e Seksionit për Hetimin e Narkotikëve në Drejtorinë Vendore të Policisë Vlorë, në kuadër të operacionit policor të koduar “Reset”, kanë goditur një rast tjetër të shpërndarjes së lëndëve narkotike në zonën bregdetare të Dhërmiut.
Në flagrancë u arrestua 46-vjeçari M. M., banues në Tiranë, i cili dyshohet se shiste kokainë në lokalet e natës.
Gjatë kontrollit u sekuestruan 126 doza kokainë, para të përfituara nga shitja dhe një peshore elektronike. Materialet u referuan Prokurorisë së Vlorës për veprime të mëtejshme.
Njoftimi i policisë:
DVP Vlorë/Finalizohet operacioni policor i koduar “Reset”, goditet një tjetër rast i shpërndarjes së lëndëve narkotike.
Vihet në pranga një 46-vjeçar që shiste kokainë në Dhërmi.
Sekuestrohen 126 doza lënde narkotike kokainë, para të përfituara nga shitja e saj dhe një peshore elektronike.
Specialistët e Seksionit për Hetimin e Narkotikëve të DVP Vlorë, në vijim të veprimeve intensive operacionale për goditjen e veprimtarisë kriminale në fushën e narkotikëve, pasi kanë siguruar informacion se një shtetas posedonte lëndë narkotike me qëllim shitjeje, kryesisht në lokalet e natës në zonën bregdetare të Dhërmiut, kanë organizuar dhe finalizuar, në bashkëpunim me shërbimet e Stacionit të Policisë Dhërmi, operacionin policor të koduar “Reset”, si rezultat i të cilit u kap dhe u arrestua në flagrancë shtetasi:
Maklit Muçaj, 46 vjeç, banues në Tiranë.
Gjatë kontrollit në dhomën ku qëndronte ky shtetas, në Drimadhes, shërbimet e Policisë gjetën dhe sekuestruan në cilësinë e provës materiale 126 doza lënde të dyshuar narkotike të llojit kokainë, 136 400 lekë të dyshuara të përfituara nga shitja e lëndës narkotike dhe një peshore elektronike.
Materialet procedurale iu referuan Prokurorisë pranë Gjykatës së Shkallës së Parë të Juridiksionit të Përgjithshëm Vlorë, për veprime të mëtejshme procedurale.
