Super modelja Emina Cunmulaj, së bashku me “Fundjavë Ndryshe” marrin përsipër të ndihmojnë një tjetër familje në nevojë. Këtë herë, Cunmulaj ka udhëtuar në Malësi, për të ndihmuar shoqen e saj të fëmijërisë.
Kjo e fundit quhet Lindita, nënë e pesë fëmijëve, të cilës i ka vdekur i shoqi para një viti. Lindita u detyrua të shkojë në shtëpinë e nënës së saj, ku po qëndron me pesë fëmijët.
Por, Emina dhe fondacioni “Fundjavë Ndryshe” kanë marrë përsipër t’i ndërtojnë Linditës një shtëpi të re, ku asaj dhe fëmijëve të mos u mungojë asgjë.
“Lindita është i vetmi prind i këtyre pesë fëmijëve dhe e kam pasur shoqe shkolle prej vitesh, kështu që njihemi që kur kemi qenë fëmijë, jemi rritur bashkë. Vitin e kaluar kur isha këtu më erdhi lajmi nga një shok i yni dhe më tha që të shihja në çfarë kushtesh jeton Lindita. Më çoi tek ajo dhe jetonte në baraka, në kushte të tmerrshme, në kushte që as kafshët nuk jetojnë jo më njeriu. Ishte shtatzënë vjet kur e kam parë dhe sa kam shkuar në Amerikë, ajo ka lindur djalin. Nëna dhe vëllai e kanë marrë në shtëpinë e tyre së bashku me pesë fëmijët e saj. Lindita ka nevojë për ndihmë, për strehim. Asaj i ka vdekur burri vitin e kaluar”, është shprehur Emina.
Modelja ka treguar se ajo së bashku me “Fundjavë ndryshe” kanë arritur të mbledhin 15 mijë dollarë për Linditën dhe fëmijët e saj. Por, Emina ka bërë thirrje për ndihmë pasi duhen fonde të tjera. Modelja është shprehur optimiste dhe e sigurt që shqiptarët do të japin kontributin e tyre për t`i siguruar Linditës dhe fëmijëve të saj një jetë më të mirë.
Emina Çunmulaj së bashku me “Fundjavë ndryshe” kanë ndryshuar jetën e disa familjeve që jetonin në kushte të vështira ekonomike. Ajo ka treguar se kanë ushqyer 50 familje për 6 muaj, 25 në rrethin e Shkodrës dhe 25 në atë të Tiranës.
