Komiteti Shqiptar i Helsinkit (KShH) ka denoncuar publikisht një rast dhune të ushtruar nga efektivë të Policisë së Komisariatit Nr. 1 në Tiranë ndaj një fëmije 14-vjeçar, ngjarje e ndodhur më 12 prill 2025 pranë zonës së Kodrës së Liqenit. Sipas ankesës së prindërve të të miturit, i riu u ndalua pasi u kap duke hedhur kapsolla, por gjatë ndalimit ai është dhunuar fizikisht dhe psikologjikisht.
Dy vëzhgues të KShH-së, të dërguar për të verifikuar ngjarjen, raportuan se në dokumentacionin zyrtar figuron një hematomë pranë syrit të djathtë të të miturit, por nuk ka asnjë evidencë që ai të jetë kontrolluar nga mjeku i komisariatit. Sipas KShH-së, kjo përbën shkelje të procedurave standarde për trajtimin e të ndaluarve.
Vetëm pas ndërhyrjes së prindërve, i mituri u dërgua në Spitalin e Traumës në orën 20:00 të po asaj dite. Epikriza mjekësore e siguruar nga familjarët flet për “Contuzion capitis” dhe se djali ishte goditur me grushta.
Gjithashtu, sipas vëzhguesve të KShH-së, në regjistrat e komisariatit u vunë re korrigjime në oraret, emrat e punonjësve dhe të psikologes që supozohej të kishte qenë e pranishme. Megjithatë, rezultoi se psikologia kishte kontaktuar me të miturin vetëm në ambientet e spitalit dhe jo në komisariat, duke ngritur dyshime mbi korrektësinë e dokumentimit nga policia.
KShH arrin në përfundimin se ndaj të miturit J.G është ushtruar dhunë, gjë që konfirmohet si nga pamja fizike, ashtu edhe nga diagnoza mjekësore. Organi i akuzës dhe Agjencia e Mbikëqyrjes Policore janë njoftuar për rastin nga familjarët më 13 prill 2025.
KShH i bën thirrje institucioneve kompetente që ta hetojnë rastin me përparësi dhe seriozitet, për të zbardhur plotësisht ngjarjen dhe për të parandaluar raste të ngjashme në të ardhmen.
“Fakti i mësipërm u mohua nga punonjësit e policisë. Megjithëse në raportin e përmendur më lart ishte shënuar hematoma, nuk rezultoi që i mituri të ishte vizituar nga mjeku i Komisariatit, në kundërshtim me parashikimet e Kreut IV, të Procedurës Standarde…”, – thuhet në deklaratën e Komitetit Shqiptar të Helsinkit.
