Rastet e dhunës në familje, fatkeqësisht sa vijnë e shtohen. Vetëm në 24 orët e fundit janë evidentuar tre raste të tilla.
Rastet janë bërë të ditura nga Policia e Shtetit, e cila njofton se ka arrestuar tre persona, të cilët kanë ushtruar dhunë ndaj nënës, bashkëshortes dhe vëllait.
Konkretisht, janë arrestuar për dhunë në familje shtetasit:
– I.Sh, 42 vjeç, banues në Tiranë, pasi për motive të dobëta ka ushtruar dhunë fizike dhe psikologjike ndaj të ëmës, shtetases F.Sh.,68 vjeçe.
Gjithashtu gjatë kontrollit të ushtruar në banesë iu gjet dhe një thikë në kushtet e armës së ftohtë pa leje.
– A.N. 28 vjeç, banues në Tiranë, pasi në banesë ka ushtruar dhunë fizike ndaj bashkëshortes, shtetases N.B., 25 vjeçe.
– F.P, 27 vjeç, banues në Laknas, pasi në oborrin e banesës për motive të dobëta, ka goditur me thikë në kurriz vëllain, shtetasin M.P., 24 vjeç.
Materialet iu referuan Prokurorisë së Rrethit Gjyqësorë Tiranë në ngarkim të shtetasit I.Sh., për veprat penale “Dhunë në familje” dhe “Armëmbajtje pa leje”, parashikuar nga nenet 130/a dhe 279 të Kodit Penal, në ngarkim të shtetasit A.N., për veprën penale “Dhunë në familje”, parashikuar nga neni 130/a i Kodit Penal, dhe në ngarkim të shtetasit F.P., për veprat penale “Plagosje e lehtë me dashje” dhe “Dhunë në familje”, parashikuar nga nenet 89 dhe 130/a të Kodit Penal.
