Aktori i madh Robert Ndrenika i është përgjigjur sot letrës publike të ministres së Kulturës, Mirela Kumbaro.
Kjo e fundit e ironizoi dje aktorin, të cilin e pyeti publikisht se përse ai dhe aktorët e tjerë “nuk kishin reaguar kur teatri u kthye në bingo”, përgjigje të cilën Ndrenika ia ka dhënë sot.
Në letrën, dhënë ekskluzivisht për “Panorama”, me titullin “Mirela paska bërë një gabim”, Ndrenika shkruan se “përveç fjalisë së parë që “je në një mendje me mua”, të tjerat m’u dukën kunja dhe jo shumë të sinqerta”.
Letra e plotë e Ndrenikës për Kumbaron:
E dashur Mirela!
Lexova me vëmendje letrën tënde. Përveç fjalisë së parë që je “në një mendje me mua”, të tjerat m’u dukën kunja dhe jo shumë të sinqerta! Përsa më përket mua, përveç mënyrës së të shprehurit që ndoshta vjen nga profesioni im (mirë do ishte të kisha studiuar për diplomaci), unë nuk heq asnjë presje nga ato që kam thënë. Bingoja u hap në një situatë emergjente me aprovimin e tërë komunitetit teatror dhe kur paraardhësit e tu në Ministrinë e Kulturës deri në vitin 2000 nuk lanë hapësirë pa dhënë me qira.
Përsa i përket ndërtimit të sallave te “Piramida” dhe te “Turbina”, e kishit ju për detyrë që të kishit bërë dhe të bëni transparencën. “Transparencë” që sot edhe kësaj dite ne po e kërkojmë. Vazhdimin e bisedës do ta bëjmë në sallën e Teatrit Kombëtar.
Me respekt, Roberti!
