Një rast i pazakontë është zbuluar nga autoritetet në Shkup, ku një 25-vjeçare dyshohet se ka tentuar të fusë lëndë narkotike në burgun e Idrizovës. Sipas informacioneve, ajo kishte shkuar për vizitë tek bashkëshorti i saj i burgosur, duke marrë me vete 60 vezë. Gjatë kontrollit, u konstatua se 28 prej tyre përmbanin kokainë dhe marihuanë.
Dyshimet e gardianëve lindën gjatë kontrollit rutinë, kur u vunë re parregullsi në paketim. Pas skanimit dhe verifikimit manual, brenda vezëve u gjetën qese të vogla me kokainë dhe marihuanë. Nga sekuestrimi rezultoi se bëhej fjalë për mbi 318 gramë marihuanë dhe rreth 142 gramë kokainë. Menjëherë pas zbulimit, Prokuroria nisi procedurat hetimore ndaj 25-vjeçares, e dyshuar për prodhim dhe shpërndarje të paligjshme të lëndëve narkotike.
Hetuesit dyshojnë se droga kishte si destinacion ambientet e brendshme të burgut, duke rikthyer në vëmendje problemin e tentativave të vazhdueshme për futjen e narkotikëve në institucionet penitenciare të Maqedonisë së Veriut.
Prokuroria kërkoi masën e arrestit shtëpiak për të dyshuarën, me argumentin se ekziston rrezik arratisjeje dhe mundësi për përsëritje të veprës penale. Megjithatë, në shqyrtimin e masës është marrë parasysh edhe fakti që ajo është nënë e disa fëmijëve të mitur, përfshirë një foshnje pesë muajshe.
