Deputeti i Partisë Demokratike, Dashnor Sula, ka deklaruar se kryebashkiaku i Tiranës, Erion Veliaj, nuk do të mund t’i shpëtojë përballjes me drejtësinë.
I ftuar në një emision televiziv, Sula ka akuzuar Veliajn për përfshirje në korrupsion së bashku me familjarët e tij, duke u bazuar në deklaratat e Prokurorisë së Posaçme (SPAK).
“Veliaj ka bërë përpjekje për të lobuar në SHBA dhe ka ushtruar presion ndaj Ramës për të shmangur arrestimin, por është e pamundur që të shpëtojë nga procesi penal dhe drejtësia. Ai është kapur në flagrancë për korrupsion, dhe kjo tashmë është fakt i konfirmuar nga SPAK. Madje, socialistë të lartë si Nesti Angoni janë ndër ata që kanë njohuri për këto korrupsione,” tha Sula.
Ndër të tjera, deputeti theksoi se hetimet mbi çështjen e inceneratorëve janë meritë e opozitës.
“Inceneratorët janë zbuluar nga opozita. Kjo skemë korrupsioni ka arritur në atë pikë sa është e pamundur të mbulohet më. Erdhën nga asgjëja dhe u bënë miliarderë. Nëse Berisha do të ishte akuzuar me prova për abuzim me tendera apo fonde publike, unë nuk do të kisha argumente për ta mbrojtur. Por kjo ndaj tij është thjesht një ndjekje politike, sepse nëse SPAK do të kishte prova të vërteta, nuk do ta kishte falur,” përfundoi Sula.
