Një bilanc tragjik është shënuar si pasojë e përplasjeve me armë zjarri mes grupeve rivale në Meksikë. Autoritetet bëjnë me dije se dhjetë persona janë vrarë, dhe dy të tjerë janë plagosur në një përplasje mes dy grupeve rivale dhe policisë në shtetin jugor të Guerrero, në Meksikë.
Zëdhënësi i sigurimit të shtetit Roberto Alvarez, në një deklaratë tha se të shtënat me armë ndodhën të dielën, në një autostradë në qytetin Paraiso de Tepila, në komunën Chilapa, ndërsa shkaqet ende mbeten mister.
Policia ka shkuar në vendngjarje pas një telefonate, dhe ka gjetur dy furgonë me 10 trupa të vdekur.
Në vendngjarje janë gjetur gjithashtu pistoleta dhe pushkë. Banorët kanë thënë se dy të plagosurit janë larguar nga zona, me shumë mundësi në kërkim të ndihmës së shpejtë.
