Kreu i Policisë së Shtetit njoftoi sot në një konferencë për shtyp shkarkimin e 12 drejtuesve të Policisë së Elbasanit.
Sipas Çakos, shkarkimet vijnë pas ngjarjes në Elbasan, ku drejtuesit e policisë u treguan të paaftë dhe cenuan imazhin e Policisë së Shtetit. Por, kujt ia beson Çako Drejtorinë e Policisë së Elbasanit pas shkrirjes së saj?
Mësohet se në krye të Policisë së Elbasanit emërohet një nga drejtuesit më të lartë të Policisë së Shtetit, Drejtorin e Departamentit të Sigurisë Drejtues i Lartë Altin Qato, i cili do të mbështetet nga një sërë specialistësh të Drejtorisë së Përgjithshme të Policisë së Shtetit.
Po ashtu, Çako njoftoi se Drejtoria Vendore e Policisë Elbasan do t’i nënshtrohet një ristrukturimi nga themelet dhe do të godasë fort dhe deri në fund, për asgjësimin e çdo rrjeti kriminal në zonën e Elbasanit.
Kreu i Policisë se Shtetit u pyet edhe operacionin e zhvilluar në Babicë të Vlorës, ku u kapën rreth 4.5 ton drogë.
Por Çako iu shmang kësaj pyetjeje, teksa tha se çështja është ende në hetim dhe se ndoshta do të ketë një moment të dytë ku do të bëhet analiza e situatës dhe e gjithë ngjarjes:
“Çdo veprimtari e policisë është në një analizë të plotë dhe të detajuar. Është një hetim në kuadër të dosjes për goditjen e grupit të strukturuar kriminal “Habilaj”. Është operacion në vazhdim, do kemi tjetër komunikim të detajuar. Një tjetër zyrtar i lartë i policisë pak më vonë do të komunikojë në lidhje me këtë çështje”, tha Çako./ Tirana Today
